Pande besi

Pande besi  taksih saged  kawula tingali kinten-kinten  wekdal tigang minggu kapungkur, injih menika rikala  kawula sanjang dateng peken .

Èstunipun ing sepindah kawula dateng peken nggadahi niat badhé  tumbas  sekar kagem  sarana kirim donga Bapak -ingkang nembé kémawon dipun timbali Ingkang Maha Kuwaos- wonten ing pasaréan.

Ananging  wekdal saged ningali tukang pande besi  èstu kawula mboten saged énggal-énggal  merlokaken tumbas sekar. Kula malah  ‘ketungkul’  dateng  obyek ingkang nami ‘pande besi’  menika.

.

Pande besi

‘

Ngalami kedadosan kados mekaten èstunipun kula injih dipun sawang kalian kathah piyantun.  Kula njih mboten badhé sélak menawi ingkang nyawang mesthinipun gadhah  pamanggih menawi kula menika ‘katon ndesa’ malah kepara saged kasebat “ndesa kluthuk!”    Kawula saged ngrumaosi kedadosan kados mekaten kok.

Wangsul dhumateng babagan pande besi, temtuniupun wonten sebab-musababipun  menawi kula katon ‘ndésa’  kados mekaten.

Nuwun injih, Panci leres wonten musababipun  kula katon nggumunan wekdal ningali pande besi.  Mboten sanès injih menika  kemutan rikala taksih alit rumiyin sesarengan kalian Bapak dipun gendhong  ingkang saperlu  dandan pacul ingkang sampung gowang utawi cacat.

Leres memawi pande besi menika injih panggènan ingkang dipun pigunakaken kagem dandan  ubarampe tani tuwin rumah tangga, kados ta; pacul, arit, pethèl, wadung, pécok, lan sakpinunggalanipun.

Rikala alit, kula asring dipun ajak Bapak dandan pacul. Injih menika  asringipun  menawi badhé manjing wekdal garap sawah, macul, lan tandur.    Kaleresan ingkang kula tingali rikala wingi menika injih pande besi ingkang  dipun laksanaken déning satunggaling piyantun éstri.

Nyawang  pedamelan  Pande besi, èstu wonten babagan “syarat makna” tuwin ‘ngemu pesen’ dhumateng kida sedaya. Utamanipun wonten ing babagan kautaman kita gesang menika.

Sak mempan-mempané  arit bakal ana cacat uga.

Saged dipun resepi maknanipun; bilih sak pinter-pinteripun jalma, mboten sélak samangke injih badhé manggihi babagan ingkang saged damel kekirangan ugi.  Wonten ing kahanan kados mekaten, menawi dipun tepak’aken dhumateng  kita sedaya, mboten sélak menawi kita menika ugi mbetahaken sarana ‘panggemblegan’ ingkang asma pande besi.

Pramila langukung  becik sumangga sesarengan ngupadi kamanpangatan dhiri dhumateng piyantun sanès ingkang tuwuh saking landeping raos tuwin manah.  Mboten kok malah kosok-wangsulipun, nambah ndableg lan mboten wonten kepinginan  ngasah rasa dhiri.    [uth]

___________________________________________________

Gambar Pande Besi kapacak saking Pasar tradisional, Nanggulan KP Jogja.

Mandiri lan BCA

Mandiri lan BCA kalebu Bank kang gedhé ana ing negara Indonésia kéné. Ana kabar sing dak rasa becik tur nyenengaké ngéngingi babagan Bank loro iku, yaiku dadi sak kloron Bank kang ana ing tahun iki bisa nyawiji anggon nggulawenthah mesin sing aran ATM.

Tembung ATM  kedadèn saka singkatan Anjungan tunai Mandiri,  yaiku mesin kang bisa digunakaké kanggo transaksi saka  dhuwit kang kasimpen ana ing Bank. Menawa ana ing wektu-wektu sakdurungé antarané Bank Mandiri lan BCA madeg dhéwé-dhéwé, mula ana ing tahun iki lan sakterusé ATM Bank loro iku bisa digunakaké antaraning siji lan sijiné. Déné istilah modèrn reruntunganing Bank loro iku mau bisa diarani bersinèrgi.

Sinèrgi antaraning sak kloron Bank iku ana ing wektu wingi wus diresmèkaké. Ora tanggung-tanggung kang ngresmèkaké yaiku déning penggedhé Bank Indonésia, Pak Darman Nasution minangka Gubernur Bank Indonésia.

Sinèrgi iku akèh gawé senenging ati amarga bab iku bisa nepisaké  dakwa “persaingan ora séhat”  sing wus naté  katenger antara Bank Mandiri utawa BCA. Bank Mandiri ngunggul-unggulaké menawa dhèwèké  kalebu Bank kang ana ing ngisor naungané BUMN, déné BCA  bisa  jumawa amarga  ngeklim  menawa dhèwèké iku kalebu Bank swasta kang bisa madeg-maju  tanpa campur tanganing pamarintah.

.

Anjungan

‘

Minangka dadi wong cilik  sing mesthi awak kabèh ya bisa ndhèrèk mangayubagya sebab ana telung perkara kang disawang bisa nguntungaké.

Kaping pisan, awak kabèh bisa seneng amarga bisa migunakaké  akèh cacahé ATM kang sumebar.

Kaping loro, Mandiri lan uga BCA bisa ngirit béaya amarga ora kumudu terus-terusan saingan gawé sarta mbangun layanan ATM. Jalaran saka iku ora sélak menawa imbas marang awak kang dadi nasabah mbésuké ya rada di ènthèngaké saka beban biaya kang membengkak.

Kaping telu, hudu bab kang mustahil menawa bunga krèdhit bisa mudhun minangka  konsekuensi saka prèstasi nahan mungguhing  pembiayaan.

Ana ing tantangan global nyawijining Bank Mandiri lan uga BCA iku yèn dirasa ya ngemu paédah lan manpangat kang matikel. Kayadéné kang padha dèn mangertèni yèn ana ing tahun ngarep iku perdagangan ASEAN  waé Bank-Bank ana ing Indonésia iki wus bakal ngadhepi gumebyaring Bank negara liyan, kamangka ora kena dèn sepèlèkaké menawa Bank-Bank saka negara manca iku nduwèni pawitan ora cilik cacahé.

Kudu diakoni menawa kahanan Bank Nasional iki isih adoh saka kelasing persaingan. Mula saka iku wus ora bisa sélak Bank-Bank ana ing Indonésia iki ya kudu cancut taliwanda, kepiye carané supaya bisa nggulawenthah Bank kanggo kemajuaning sapadha.

Sinèrgi iku kalebu langkah kang trap kanggoning jiwa-bangsa lantaran ora kena disélaki Indonésia iki kedadèn ya amarga antaraning siji lan sijiné uga bersinèrgi  sarta gotong royong. Mula muga-muga isih ana usaha liya kang nduwèni krenteg kayadéné kang wus dilakoni dèning Bank Mandiri lan uga Bank BCA kuwi. [uth]

________________________________________________________

An illustration of  ‘Mandiri lan BCA‘ is taken from bestlagu without permission